今日與你相眾一刻o既係…….阿卵

回想當年第一次買手提電話,係10年前NEC既產品,型號已經唔係好記得,淨係記得當年都幾多人用呢部機,銀色、扁扁長長又帶有少少流線型,有一條短既天線仔。

以前番學放過係校褸袋到,係會覺得自己好有型,有種覺得自己係大人既感覺….

當部NEC壽終正寢之後,我既第2部手機就係Nokia既3310,即係類似而家D的士司機,擺幾部係車頭接客用個D,佢既優點絕對係襟用,同埋有得玩貪食蛇,佢係我用得最耐既一部手機。

之後就係LG既朱古力喇,當初買佢番黎絕對係因為佢既發光輕觸式鍵盤好靚,但係佢就好似係一個好靚既女仔咁紅顏薄命,佢比之前2部機都快玩完,仲有佢既輕觸式鍵盤有時太過敏感,講講下電話唔小心”high high”個制就會收左線,可能真係好難搵到同時有外在美同內在美既手機…..

不過佢既死,係我一手做成既,之前我唔小心將原本已經體弱多病既佢跌左落地之後,佢就再無醒過喇…..

但係個日我連為佢惋惜既時間都無,因為個日工作需要,我要立即有部電話,於是我就係附近既電話舖買左部二手既Nokia機,我連佢既型號都唔知,但係,呢幾日當我開始習慣番佢既操控同埋心想Nokia機真係幾好用既時候,SUPRISE!!女朋友突然送左部新既手機俾我做生日禮物,係LG機,唔使問緊係靚啦。可憐我剛剛買左幾日既Nokia幾好用二手機而家只有成為後備喇。

聽日將會有…..白只…..同大家見面!

敬請留意!