公交 - 阿卵

今日同大家相眾一刻o既有阿卵!  

回想早幾年,搭得最多既交通工具應該係渡海小輪, 因為我本身住長洲,又要出o黎香港區讀書, 每日來回要搭兩次船係走唔甩。係我細細個o個陣, 渡海小輪服務係由油麻地小輪公司負責, 係o個個年頭係未有所謂o既「快船」 。之後新渡輪公司接手, 有o左「快船」o既出現, 離島o既居民們可以用貴一倍o既船費買到朝頭早多半個鐘o既訓覺 時間,因為遲半個鐘頭出發o既「快船」 到達中環o既時間同早半個鐘頭開船o既慢船係差唔多,咁我當然都係用錢買時間訓覺o既一群啦。  

新渡輪公司o既龐大,係我讀緊中學o既時候係意想不到的, 因為我地以前一班充滿理想o既同學,有o的畢業出o黎之後, 都要臣服係新渡輪公司o既旗下做售票員, 不過其實做咩工都無所謂,行行出狀元, 只係有時長時間生活係一種沉悶死寂o既環境下, 係會將一個人磨蝕,以前番學上堂大家都有講有笑o既同學, 而家係搭船買飛o既時候如同陌路,係有o的可惜。 令我諗起之前睇麥兜有其中一個片段係, 麥兜同個隻牛牛細個o既時候係好好o既同學, 但係大個o左就好似唔認得對方一樣。 

  聽日會有白只同大家見面!!