阿倫的志願

以有一套叫做[魔動王]嘅卡通片，裡面個主角係個小學四年級嘅學生，佢去咗月球旅行，係月球到遇到一個老婆婆同一個細路女，老婆婆俾咗個機械人叫做[地隱俠]嘅佢駕駛，之後佢就去咗拯救月球喇。嗰個時候我每日都期待當我升小學四年級嘅時候，我都可以去月球去駕駛地隱俠，但係到咗我小學四年級嘅時候，我無去到月球旅行，我仲係地球上面，我有遇到啲老婆婆同細路女，但係佢地無俾到[地隱俠]我，所以，人生第一個志願已經完成唔到喇。 其實我由細到大都係好鐘意發白日夢，如果呢個世界有一份工係可以就咁坐係到發白日夢就有錢收既話就好喇，呢一份絕對係最理想既職業。但係，我地點樣去釐定員工既工作表現呢？一個出色o既發白日夢員工，應該要有三個條件： 第一個條件:視覺 - 長時間唔眨眼，目光呆滯地，視線集中係一點，但係如果你跟住佢既視線去望，係應該唔知佢望緊咩既。 第二個條件:聽覺 - 一個發緊白日夢既人係聽到野既，但係你同佢講野，佢第一句答你既一定係「咩話?」 第三個條件:身體 狀態 - 全身放鬆，四肢無力，咀唇微微張開，頸部無力支持頭部，所以頭部會呈向後仰，或者向前dup左 符合以上呢3個條件既人，佢一定係發緊白日夢，如果呢個世界上真係有一份專係發白日夢既工作，咁我就有我的志願了。