我好鐘意發夢，因為發夢可以經歷到D現實世界經歷唔到o既o野，之前，我發o左一個咁樣o既夢，係夢入邊我係一個特務，組織委派o左一個任務俾我，要我去敵人o既基地做偵察，但係得我一個人去做係好危險o既，一定要有一個同我好合拍o既人幫手先至可以完成到個任務，於是組織o既科學家搵左個軍人o黎，唔知點解係西人o黎o既，印象中佢個樣仲有小小似辛潘，跟住我地就坐o左係一部機器上面，擺出左一個好似武俠片運功療傷o既姿勢，就係咁樣我過左D靈魂俾佢，於是佢就變成左另一個我喇。

咁而家有2個我，就最合拍啦!

之後我地夜晚就潛入左敵人o既基地，順利完成左任務，跟住番返去自己基地個到，我要回收番我過左俾佢o既靈魂，我地又用番武俠片o既姿勢坐番係部機o既上面，當我要吸收番自己o既靈魂o既時候，我感覺到另一個自己無輸送番靈魂俾我，試左好耐都唔得，於是個科學家問發生咩事，我個另一個自己就搶住答話:「我無吸收番佢o既靈魂。」個科學家同上頭都信哂佢講o既野，於是佢地要追殺我，我望o左另一個自己一眼，佢望住我笑o左一下，於是我就逃走喇，但係我o既另一個自己不斷追住我，一直走走走，走到去一個緣崖o既時候佢追到o黎，於是我問佢，點解要講大話，點解唔俾我吸收番自己個靈魂，於是佢就答我，因為我想生存落去，之後佢就推左我落緣崖喇。

我醒左之後就不斷係到諗，點解我會發個咁既夢呢?當中係咪有咩含意呢?係咪我對於自己既身份有d模糊呢?仲有o個個人點解一定係西人呢?最後我發現點解會發呢個夢係無特別原因o既，只係o個排咁o岩睇o左套電影叫做<謊島叛變>。

~完~